IN GIR PER LA BRIANZA: FEST E FER IN GENAR

La Brianza, tèrra originaria de paisan, anca con la globalizzazion che la ghe fa diventà tucc istess, la desmentega minga i sò radis e la rèsta fedel ai sò tradizion. Inscì, anca in del mes de genar, el pussee fregg de l’ann, la Brianza la se troeuva in piazza per fà festa, al cald di falò e del vin brulè.

Se comenza a la sira del 5 de genar ad Agliàa, frazion de Caràa, per festeggà l’Epifania, e mantegnì viva come patrimòni coltural de l’infanzia la Befana che la riva su l’acqua del Lamber tra musica e foeugh artificial. Al 6 de genar se regala ai bagaj el “Paporòtt”, on “pupazzo” del pan dolz con l’ughètta.
L'ultim giovedì de genar l’è invece la nòcc de la Giubiana L’origin del nòm l’è incerta: on quejghedun el dis ch’el deriva dal cult a la divinità de Giunon (da chì el nòm Joviana). Alter invece el colleghen a Giove, giovedì: el nòm el derivaria dal dio latin "Jupiter-Jovis", da lì Giovia e poeu Giobia per indicà i fèst che i paisan faseven per propizià el racòlt de l’ann
La leggenda la cunta che la Giubiana l’è ona stria, magra, cont i gamb  longh e i calzètt ross. La viv in su i piant di bosch e la fa stremì tucc quei che ghe va denter, soratutt i bagaj, e a l’ultim giovedì de genar la va in gir a cercan on quejghedun per mangial. Ma ona mamma, che ghe vovera ben al sò bagaj, la gh’ha tenduu ona trappola: ona nòtt l’ha preparaa ona pignatta de risòtt giald con la luganega e l’ha mettuu su ona finestra. La Giubiana l’ha sentuu el profumm e con la soa scova l’è volada vers la pignatta e l’ha comenzaa a mangial. El risòtt l’era inscì bon che la Giubiana la s’è minga accorgiuda che gh’era adree a rivà el sô che, come se sa, el mazza i strii: el bagaj el s’è inscì salvaa.
La Giubiana, ancamò adèss, in de l’ultim giovedì de genar, la se brusa in sul falò in tanti paes de Brianza
I falò se pizzen anche in prossimità del 17 de genar, ricorrenza di S. Antoni abate: pròppi da lù la festa la ciappa el nòm de "Falò de Sant’Antoni". Se brusen fassin de lègna per cascià via i guai e per scongiurà on cattiv racòlt. Fa part de la tradizion trà speranza dal moviment de la "barba" del Sant.
In quasi tutt i paes de la Brianza el derzètt de genar se ripet la tradizion di falò.

FILASTROCCA SU SANT’ANTONI

Sant’Antòni del porscèll

ch’el sònava el campanèll

el campanèll el s’è s’cepaa

Sant’Antòni l’è scapaa

l’è scapaa dedree ‘na pòrta

gh’era là ona dònna mòrta

la dònna mòrta l’ha sguagnii

Sant’Antòni el s’è stremii

el s’è stremii d’ona manèra

che ogni ann ghe fann la fèra.

Gh’èra pizz i candilee

Sant’Antòni el gh’è andaa ‘dree

el gh’è andaa ‘dree per fagh onor,

Sant’Antòni l’era on scior

l’era on scior senza peccaa,

sant’Antòni el s’è salvaa.

el s’è salvaa in Paradìs:

sant’Antòni e san Luìs.


Renato Baroni